2 Samuel 23

Devitiva ekaara uva tura

1Devitiva ekaanaini maa uvara tura: Te Iesira maaqu Devitika mintima turo:

• Tinavu kaivaqara Iekopira Variqavano ti kaama tero noraiqama kaimanta te avuhainaa vaiinti vauraro viva vaiinti nahenti nivuqaa ti nora autu timirave. Viva mintirara ti, te koqe ihi Isareri tiate ti, vo ihi vo ihi tivake qara ntuva taunara.

2

• Nora Kotira Maraquravano nai uva ti noqaahairo ti vaivo. Vira uvavano ti noqi vaimanta te vi uvarama ti vauro.

3

• Isareri Variqavano viva tinavu Isareri antua timite vai oriva vaiharo tiriara tiharo, Avuhainaa vaiintivano ti Kotika aatu qeteharo ti vevaaraini vaiharo avuqavuqama kero vaiinti nahentiqaa raqiki vaiva vaireva,

4vi vaiintiva kuarivano toqaqi uruntero koqema kero ite vaivaro kia tonavuvanovata kuari avu mantaaqa kaira voqaara vairamanta vaiinti nahenti virara quaheha vaivarave. Aaquvano ntuvakero tanta vivaro varavuvano ahika mareqaahairo aera aera i vaira voqaara vi vaiintiva vairamanta vaiinti nahenti virara quaheha vaivarave. 5

• Kotiva ti hampata uva vo tiva taatau tairara tiro, viva kiama vi uvara qaqira kero vo uva tiraitiro, ekaa entama vi uvara avataanarove.

• Viva mintimakero ti anku koqema nimitaqiro vuanarove.

• Viva ti kahaqiharo ti muntukavano vaina haikara vo haika vo haika ti timiraqe, te koqemake variqi vuare.

6

• Ho te mintimake variqi vuarirauka vauramanta qora okara auti variaka auqu vai naaquntara teqake iha quara taavaro ita vintemake, vika taiqa vivarave.

• Vaiintivano auqu vai naaquntara nutu ruvaaquma kareva iharo, kauqu ranteqa kaantorave tiro, viva vira kia kauquqohai utu vararaitiro,

7 aini kauruve, vaantaara aquve, varero viraqohairo auqu naaqunta vohaaraqaa rupikero ruvaaquma kero iha quara kaivaro ita taiqa virave, tiro. Devitiva minti tura.

Devitira Iqoka Vaiinti Taruka nutu

8DevitiraIqoka Vaiinti Taruka Taaramonavu nutu:

• Vinavukaqihairo Iosepi-Basebetiva Takemoni ankuqiraava, avuni vaura. Vo enta viva vaantaara varero navutaaka 800 navu hampata raqiharo, vohaa vi entaraqai ekaa vika aru taiqa kora.

9

• Viva vauvaro Ahohira ankuqihainaa vaiinti Dodora maaqu Eleasaava, viva taaramonavuqihairo iqoka vaiinti taruva vovano vaura.

• Vo enta Eleasaava Devitikantiro vaumanta Pirisia Isareri hampata raqireka anumanta Isareri vika naatu qetake ruqemake vuvaro

10Eleasaava nariaraa mini kempukaiqama kero vaiharo Pirisia ntaihe vaura. Viva vukaiqaakero raquqi vuvaro vira kauquvano paama tivakero iqoka paipe aquqaa taatau vuvaro viva iqoka paipe tuta kaarirava kia ho vaura. Ho Noravano Kotiva vira kahaquvaro viva iqoka raquqiro viharo Pirisia vika naatara kora. Viva vika naatara komanta Isareri vika orurante Eleasaava unaini aninte tavovaro viva Pirisia vika aru taiqa komantara ti, vika navutaaka iqoka utavaaqa rahunkuke varevaqai vaura. 11

• Agira maaqu Haraaqihainaava Samaava, viva taaramo vaiinti vinavukaqihairo iqoka vaiinti taruva vovano vaura.

• Vo enta Lehi vatukaini naavara naaho vaunaini Pirisia vika ruvaaqumavi vaumanta Isareri vika tave qetake vura.

12

• Mintuvaro Samaava kia qetaraitiro, viva naaho avutaqaa himpi vaiharo Pirisia vika vi karara varevorave tiro, kempukaiqama kero iqoka raqiharo vika airitahaa arukora. Vi entara Noravano Kotiva Samaara kahaquvaro viva Pirisia airitahaa naatara kora.

Devitira iqoka vaiinti taruka 30 navu

13˻Ho Devitira iqoka vaiinti vokuka iqoka vaiinti tarukavata vaura. Vika vinavuka autu ntarekaIqoka Vaiinti Taruka 30 navuve tura.˼

Vo enta, kara mpeqaiqura qantu entara, Pirisia iqoka vaiinti vonavu ani náiseri naavu maaqa Refaimi Uqitaini kaqate vauvaro Devitiva Adulaamu Onavuqi vaumanta DevitiraIqoka Vaiinti Taruka 30 navuqihai taaramonavu oru Devitira tavareka oruntora.

14Vi entara Devitiva ˻Adulaamu Onavuqi˼ kukeqa viharo vaunaini vaumanta Pirisia vokuka Betarihemi vatukaini vaura.

15Mintuvaro Devitiva voqama kero namari naataa uvaro tiharo, Mpo, Betarihemini qenti aumanto vai ruvu namarira ti voqama kero naataa ivo. Vovano kaqa varero viri ti timirera, te hove tiataarave, tiro.

16Devitiva minti tumanta iqoka vaiinti taruka taaramonavu Devitiva namariara tu uvara iri, vinavuka himpi mini oru namari kaqareka vura. Pirisia vika Betarihemiqi vaiha maimaraara raqiki vaumanta taaramo vaiinti vinavuka kia qetaraiti, oru Devitiva ruvu namariara tura kaqa vare viri vira amura.

Vira viri amuvaro viva vi namarira kia naraitiro, vivaofaa voqaara Nora Kotira qihia amitero 17tiharo, Oho, Noravauvo, te maa namarira naarorave. Navutaaka vi vaiintinavuka arukerara kia noraiqaake iriraiti, maa namarira kaqa vare viri ti timiavo. Navutaaka vinavuka arukaatirio, vinavuka naarevano tiqaama vaitirio.

Virara irihama te maa namarira vinavuka naare voqaara ntaira hauri naarorave, tivakero kia vi namarira nora. Ho Devitira iqoka vaiinti taruka taaramonavu kia nái qaqi variqi virara noraiqaake iriraiti, vinavuka mintura.

18AbisaivaIqoka Vaiinti Taruka 30 navuqihairo vika qiata vaiintivano vaura. Abisaiva Ioaapira vakaava vauvaro vitanta nova Seruiava vaura.

Ho vo enta Abisaiva nai vaantaaraqohairo navutaaka 300 navu hampata raquqi viharo vika ekaa arukora. Viva minturara ti, taaramo iqoka vaiintinavu nora autu varontema kero, vivavata nora autu varora.

19Vira nora autuvano voqavata uritarero vauvaro vivaIqoka Vaiinti 30 navuqihairo nora vaiintivano vauvarovata, vira autuvano kiaIqoka Vaiinti Taruka Taaramonavu nutu naatara kora.

20Ho Jehoiadaara maaqu Benaiaava Kapaselihainaava, vivavata iqoka vaiinti taruva kempukaiqama kero navutaaka hampata iqoka raqi vaura.

• Vo enta viva Moapihainaa iqoka vaiinti taruka taaraqanta aru kora.

• Vo entataaru/kaampura aaqu ntuva kovaro Benaiaavaruvuqi/mpumpiqi otiqeteroraioni vo aru kora.

21

• Qaiqaa vo enta viva Isipi vaiinti vo, nora vaiintiruhaa aru kora. Isipi vaiinti viva vaantaara tuatovaro Benaiaava kaavu varero vikantiro raqiharo Isipi vaiinti kauquqihairo vira vaantaara raqiakero viraqohairo nai vira arukora.

22Benaiaava mintima kero raqurara tiro, vira autuvanoIqoka Vaiinti Taruka 30 navu nutuqihairo nora autu vaura.

23Mintuvarovata, vira autuvano kiaIqoka Vaiinti TarukaTaaramonavu nutu naatara kora.

Devitiva vira noraiqama kovaro viva viraqaa maimaraara raqiki vau vaiintika qiata vaiintivano vaura.

24Iqoka Vaiinti Taruka 30 navu nutu:

• Asaheriva (Ioaapira qatavano)

• Elihanaaniva (Dodora maaqu Betarihemihainaava)

25

• Samaaka Elikaaka (vitanta Harotihainaatanta)

26

• Helesiva (Peletihainaava)

• Iraava (Ikesira maaqu Tekoa vatukaihainaava)

27

• Abieseva (Anatotihainaava)

• Mebunaiva (Husaihainaava)

28

• Salamoniva (Ahohira ankuqihainaava)

• Maharaiva (Netofi vatukaihainaava)

29Helepiva (Baanara maaqu Netofi vatukaihainaava)

• Itaiva (Ribaira maaqu Benamini vata Gibea vatukaihainaava)

30

• Benaiaava (Piratonihainaava)

• Hidaiva (Gasa onkaiqihainaava)

31

• Abi-Aliboniva (Arabaihainaava)

• Asamavetiva (Bahurimihainaava)

32

• Eliabava (Salibonihainaava)

• Jasenira maaqunavu

• Ionataaniva

33

• Samaava (Haraara ankuqihainaava)

• Ahiamuva (vira qova Saraava Haraara ankuqihainaava)

34

• Elifeletiva (Ahasibaira maaqu Makaihainaava)

• Eliamiva (Ahitopelira maaqu Gilohainaava)

35

• Hesarova (Kaamelihainaava)

• Paraiva (Araapihainaava)

36

• Igaliva (Nataanira maaqu Sobaihainaava)

• Baniva (Gaatihainaava)

37

• Selikiva (Amoni vataihainaava)

• Naharaiva (Berotihainaava Ioaapira auvihehavaa varova)

38

• Iraava (Itaraa ankuqihainaava)

• Garepiva (Itaraa ankuqihainaava)

39

• Uriaava (Hitiqihainaava)

Vi vaiintika vaireka, 37 navu vaura.